БИШКЕК, 17-ноя. — Sputnik. Мамлекеттик каттоо кызматы коомчулукка Кыргызстандын жараны паспортун жоготуп алган учурда кайра кантип калыбына келтирүү боюнча маалымкатты сунуштады. Мындай шартта өзүңүзгө Калкты тейлөө борборлорунун (КТБ) каалаган бирине же паспорттоштуруу жана калкты каттоо бөлүмдөрүнө (ПККБ) кайрылуу керек.
Бишкекте үч Калкты тейлөө борбору иштейт:
— Медеров көчөсү, 44/1 (Жукеев-Пудовкин көчөсү менен кесилишкен жердеги "Бишкек" дүң дүкөнүнүн имаратында);
— Чокан Валиханов көчөсү, 2;
— Жаш Гвардия проспекти, 4 (Бөкөнбаев көчөсү менен кесилишкен аймакта).
Эгер ID-картыңызды жоготуп алсаңыз, сизге жаңы биометрикалык паспорт жасап беришет. Буга төмөнкү документтер талап кылынат:
— туулгандыгы тууралуу күбөлүк;
— нике тууралуу күбөлүк (ажырашкандыгы, жолдошу же жубайынын өлүмү тууралуу);
— жоголгон паспорттун ордуна 2017-жылкы үлгүдөгү паспортту берүүгө арыз;
— жеке өздүгүн тастыктоочу (идентификациялык) номери же ал көрсөтүлгөн документтердин көчүрмөсү;
Эгер автоматташтырылган тутумда арыз жазган кишинин катталган дареги боюнча маалымат табылбаса, төмөндө аталган документтерди топтоо менен паспорттоштуруу жана калкты каттоо бөлүмдөрүнө (кайда жашагандыгына карабастан) кайрылууга туура келет:
— жарандын өздүгүн тастыктоочу документ;
— турак жай ээсинин паспорту (турак жай ээси да келиши шарт);
— турак жайга ээлик укугун тастыктаган документ.
Турак жай ээси келбеген шартта ал дарекке катталууга нотариус тарабынан тастыкталган уруксат кагазы керектелет.
Эгер 2017-жылкы жаңы үлгүдөгү паспорт жоголсо, анда эскисинин ордуна жаңысын алууга тапшырган арызыңыз жетишерлик. Документ 12 иш күн аралыгында даяр болот. Бул үчүн документти ыкчам каттоо, жасоо жана берүүгө төлөнгөн акы дүмүрчөгүн бересиз. Паспорттун ыкчам даярдалыш акысы: сегиз иш күндө – 1150 сом, төрт күндө — 1470, эки күндө — 1800, үч саатта — 5630 сомду түзөт.
2017-жылкы ID-картын берүүдө паспортту активдештирүү жүргүзүлөт. Жаран боюнча маалыматтар, маселен, каттоо дареги же үй-бүлөлүк абалы өзгөргөн шартта паспортту алмаштыруунун кажети жок, анткени, тийиштүү өзгөртүүлөр боюнча маалымат автоматтык түрдө Калкты тейлөөнүн бирдиктүү борборуна түшөт, андан соң жаңы документтин чибине киргизилет.
Мындан тышкары, жарандар паспортту үйгө жеткирүү кызматынан да пайдалана алышат. Жеткирүү убагы — тапшырыкты каттоо жайына келгенден кийинки 2-3 иш күн аралыгы. Бул кызматтын акысы — 100 сом.
