Кыргыз ССРинин жылдыздарынын көпчүлүк көрбөгөн сүрөттөрүн архивге баш баккан Sputnik агенттигинин кабарчылары таап чыкты. Ысымдары кылымдарга сакталчу атактуулардын ар кандай жагдайдагы сүрөттөрүн сиздерге сунуштайбыз.
Калк сүймөнчүктөрүнүн театралдык оюндагы, тасма талааларындагы, сахнадагы ирмемдери, айрымдарынын жөн гана портреттик сүрөттөрү тартылган. Көпчүлүгү жылмайса, кай бирлеринин көз карашы жараткан образдарына жараша абдан олуттуу. Кантсе да алардын баары мыкты деп саналат.
Кыргызстандын эл артисти, төкмө акын Алымкул Үсөнбаев комузда ойноп жаткан убагы, 1955-жыл. Айтмакчы, Алымкул Токтогул Сатылгановдун шакирти болгон
Ал эми бул 1958-жылкы сүрөттө Кыргызстандын биринчи балеринасы, артист Бүбүсара Бейшеналиева Кыргыз опера жана балет театры тарабынан коюлган "Чолпон" балетинде Айдайдын, балетмейстер Уран Сарбагышев Нурдиндин ролунда
Залкар манасчы, Кыргыз ССРинин эл артисти Саякбай Каралаев №3 мектеп-интернатынын окуучуларынын курчоосунда. Улуу манасчы "Манас" эпосунан жарым миллион сапты жатка билген
1967-жылкы бул ак-кара түстүү сүрөттөгү Владимир Фере — композитор, Кыргыз ССР эл артисти. Ал кыргызстандыктарга Кыргыз ССР мамлекеттик гимнинин обонунун автору катары белгилүү (Кыргыз Республикасынын гимни менен адаштырбаңыз)
Кыргыз ССРинин эл артисти, театралдык режиссер Капар Медетбеков Отеллонун ролунда, 1977-жыл
Кыргыз ССРинин эл артисти, төкмө акын, Токтогул сыйлыгынын лауреаты Эстебес Турсуналиев, 1977-жыл. Кыргыз элдик музыкалык аспаптарда ойной билген эң мыкты төкмө акындардын бири болгон
Кыргыз ССРинин эмгек сиңирген артисти Елена Орузбаева жана артист Арсанбек Ирсалиев улуттук кийимчен сахнада элдик бий аткарышууда. 1981-жыл
1981-жылкы сүрөттө композитор, Кыргыз ССРинин эл артисти, Кыргыз ССРинин мамлекеттик Токтогул сыйлыгынын ээси Насыр Давлесов. Кыргыз Республикасынын гимнинин обону улуу композиторлор Насыр Давлесов жана Калый Молдобасанов тарабынан жазылганын айта кетпесек болбойт
80-жылдар: СССРдин эл артисти, актер жана сүрөтчү Сүймөнкул Чокморов тасма аянтчасында. Ал Чыңгыз Айтматовдун чыгармалары боюнча тартылган тасмаларга көп тартылган
А бул 1984-жылкы сүрөттө Кыргыз ССРинин эл артисти, кинорежиссер, сценарист жана көптөгөн сыйлыктардын ээси Болот Шамшиевдин жүзүндө бактылуу жылмаюу бар
