БИШКЕК, 12-ноя. — Sputnik. Бишкекте жоголуп кеткен классташ кыздар Сезим Тургуналиева менен Азиза Мухамед кызы Ошко баруу үчүн акча чогултуп жүрүшкөн. Бул тууралуу Sputnik Кыргызстан агенттигине Сезимдин атасы билдирди.
Кыздар 9-ноябрда жоголуп, 11-ноябрда Оштон табылган. Алар Ош шаарына такси менен барышканы белгилүү болгон.
Сезимдин атасынын айтымында, кыздар Ошко 10-ноябрь түнү келишкен.
"Алар Ошко баруу үчүн акча чогултуп жүрүшкөн. Уюлдук аппараттарын дагы сатып салышыптыр. Милиционерлерге болсо "үйдө апаларыбыз уруша берет" деп айтышыптыр. Ооба, биздин үйдө деле кээде казан-аяк кагышат, бул нормалдуу эле көрүнүш. Улуу кызыбыз жайында ооруп калып, көңүлүбүздүн бардыгы ага бурулуп калган. Сезим чычалай берчү. Учурда кыздар Бишкекте, баары жакшы", — деди кыздын атасы.
Кызыдардын бири үйүнөн коммуналдык төлөмдөргө даярдалган 2 миң сомду алып кеткен. Ошондой эле классташтар алтын чынжырларын дагы сатып салышкан.
Мейманканада жашагандыгы үчүн алар 5200 сом төлөшкөн. Ал эми мекеменин кызматкерлери укук коргоо органдарынын өкүлдөрүн чакырууну туура көрүшкөн.
"Кыздар милиционерлерди көргөндө ыйлап жиберишти. Үйдөгүлөр аларды уруша берерин айтышып, башка себебин түшүндүрө алышкан жок. Ошко келип алып, эмне кылаарын билбей калышкан. Аларды алып кетүү үчүн келген ата-энелери дагы кыздарын көрүп ыйлап жиберишти", — деп маалымат кызматынан билдиршти.
ИИМдин өспүрүмдөрдүн иши боюнча инспекциясынын маалыматы боюнча өлкөдө жыл сайын 800 өспүрүм жоголот.
