БИШКЕК, 10-ноя. — Sputnik. Борбор калаада эки окуучу кыз жоголду. Бул тууралуу Бишкек ШИИБдин маалымат кызматы кабарлады.
Кластташтар 2004-жылкы Сезим Тургуналиева жана 2005-жылкы Азиза Мухамед кызы 9-ноябрда үйдөн чыгып, окууга кеткен боюнча дайынсыз. Кыздар №28 мектепте билим алчу.
Сезимдин өзгөчө белгилери: бою — 155-158 сантиметр, толугураак, кара, узун чачтуу. Кара түстө пальто жана юбка кийип жүргөн, бутунда жылуу мокасин. Окуучу кыз үйүнөн көк сумка асынып чыккан.
Азизанын өзгөчө белгилери: бою — 155-160 сантиметр, орто бойлуу, чачы кара, анча узун эмес. Кара юбка, кара көк куртка, бутунда ботинка кийип жүргөн.
9-ноябрда кыздар мектепке келген эмес. Күбөлөр аларды саат 14:45тер чамасында "Вефа" соода борборундагы кинотеатрдан көргөнүн айтышкан. Эки окуучу кыздын тең телефондору өчүк.
Учурда аларды жакындары жана милиция издөөдө. Эгерде кыздарды кимдир бирөө көрүп калса, (0704) 90-05-80, (0709) 68-10-19, (0772) 66-94-24, (0312) 56-60-43 же 102 номуруна чалып коюуну өтүнүшөт.
