БИШКЕК, 7-ноя. — Sputnik. АКШда сепсиске кабылган кош бойлуу аялдын боюнан түшүп, колу-бутун да кестирүүгө аргасыз болгонун Daily Mail басылмасына таянып РИА Новости жазып чыкты.
Маалыматка ылайык, 2017-жылдын март айында 31 жаштагы Кайлей Фергюсон-Уолкер алты айлык боюнча бар кезинде бөйрөгүнүн функциясы бузулуп реанимацияга түшөт. Дем алуусу оорлоп, кан басымы төмөндөп кеткен келинге алгач дарыгерлер грипп деген диагноз коюшкан. Текшерүүдөн кийин каны зилдеп кеткени аныкталып, түйүлдүк ооруканага келгенге чейин эле өрчүбөй калганы аныкталган. Эки жума комада жаткандан кийин буту-колу ириңдей баштаган да дарыгерлер Кайлейди аман алып калуу үчүн мүчөлөрүн кесүүгө аргасыз болушкан.
Кийин доктурлар сепсиске жатын моюнчасы жакшы өрчүбөй калышы себеп болгонун аныктап чыгышкан.
Кайлей учурда протездерин күтүп жатат. Ал эми бүгүнкү күндө жаңы жашоого ык алып, көнүшүүгө жолдошу менен үч жаштагы кызы жардам берүүдө.
