БИШКЕК, 4-ноя. — Sputnik. Калькуттанын медициналык колледжинин дарыгерлери индиялык кишинин ичинен узундугу беш сантиметр болгон 639 мык алып чыгышты. Бул тууралуу РИА Новости Daily Mail басылмасына таянып кабарлады.
Маалыматка ылайык, ичи ооруп, кускусу келген эркек киши ооруканага алып келинген. Аны медициналык текшерүүдөн өткөргөндө ичине мык толуп калганы аныкталган.
Эки сааттык операциянын жүрүшүндө хирургдар бейтаптын курсагын 10 сантиметрге кесип, магниттин жардамы менен металл предметтерин алып чыгышкан. Дарыгерлер мыктын учтуу, курч экенине карабай оорулуунун ички органдары олуттуу жарадар болбогонун баса белгилешкен.
Операция жасалган адам кем акыл болгондуктан, жегенге болбой турган нерселерди жутуп ала берчү. Учурда ал дарыгерлердин көзөмөлүндө.
