Ош шаарында үйдүн дубалы басып каза болгон жарандар суу түтүктөрүн орнотуу максатында жалданып иштеп жатышкан. Бул тууралуу ӨКМдин Ош шаардык башкармалыгынын башчысы Нурлан Баймуратов Sputnik Кыргызстан агенттигине билдирди.
Анын айтымында, окуя Кара-Суу районунун Шарк айыл өкмөтүнүн Мадумаров менен Ош шаарынын Памир көчөсүнүн аймагында катталган.
"Аталган даректе жашаган 10го жакын турак жай ээлери жана жеке менчик медициналык клиниканын ээси саркынды суулар кетүүчү (канализация) түтүктөрдү орнотууну пландаган. Ал үчүн Туран аймактык кеңешинин жашоочулары Максутбек Вахапов, Миркамилжан Ахмедов жана Мурабытжан Исламов менен жерди казуу боюнча макулдашышкан. Алар түтүк орнотуу үчүн жерди казып, 5-метрине жеткенде турак үйдүн пайдубалы топурагы менен кошо көчүп Максутбек Вахапов менен Миркамилжан Ахмедовду басып калган. Ал эми Мурабытжан Исламов сыртта тургандыктан аман калган", — деди Баймуратов.
Ал ошондой эле жерди казууда коопсуздук техникалары сакталбаганын белгилеп, куткаруучулар маркумдардын сөөгүн алып чыкканын кошумчалады.
