БИШКЕК, 2-ноя. — Sputnik. Howo үлгүсүндөгү оор жүк ташуучу автоунаанын айдоочусу башка машиналар менен кагышканга чейин машинадан секирип кеткен. Бул тууралуу кырсыкка күбө болгондор Sputnik Кыргызстан агенттигине билдирди.
"Гагарин көчөсүндөгү жол кырсыгына чейин жүк ташуучу автоунаа жол тандабасты сүзгөн. Андан кийин ылдый кетип, башка автоунаалар менен сүзүшкөнгө чейин машинадан секирип кетти", — деди күбө.
Бүгүн, 2-ноябрда саат 11:00дөр чамасында Гагарин жана Садырбаев (мурдагы Бах) көчөлөрүнүн кесилишинде Howo үлгүсүндөгү оор жүк ташуучу автоунаа Mercedes Sprinter микроавтобусу жана Volksvagen Golf 3 машиналары менен кагышкан. Жүк ташуучу автоунаанын айдоочусун кошкондо жалпысынан беш киши ооруканага жаткырылган, алардын экөө жаш балдар.
