ОШ, 30-окт. — Sputnik. Алай районунун Талды-Суу айыл өкмөтүндө Opel Monterey унаасы жол кырсыгына кабылып, үч жүргүнчү окуя болгон жерде каза болду. Бул тууралуу облустук кайгуул милициясынын маалымат катчысы Айбек Бечелов Sputnik Кыргызстан агенттигине билдирди.
Анын айтымында, окуя 30-октябрь күнү саат 10:00дөр чамасында Ош — Сары-Таш — Карамык унаа жолунун 208-чакырымында катталган.
"Opel Monterey унаасынын оң тарабындагы арткы дөңгөлөгү жарылып, айдоочу рулду башкара албай калгандыктан унаа 4-5 жолу оодарылып барып жол четине туруп калган. Кырсыктын кесепетинен айдоочунун 63 жаштагы атасы, 49 жаштагы апасы жана 49 жаштагы жүргүнчү аял окуя болгон жерде каза болгон. Ал эми айдоочу менен кошо унаадагы үч жүргүнчү Алай райондук ооруканасынын хирургия бөлүмүнө жеткирилген", — деди Бечелов.
Кайгуул милициясы кырсык катталган аймакты текшерип, окуянын келип чыгуу себебин иликтеп жатат.
