КАРАКОЛ, 27-окт. — Sputnik. Ысык-Көл облусунун Каракол шаарындагы Касым Тыныстанов атындагы аллеяга "Каракол жаңырыгы" аттуу көчө радиосу орнотулду.
Мындай демилгени Караколдун маданият үйүнүн директору Саламат Медербеков эки жыл мурда көтөргөн.
"Мен оператор болуп иштеп жүргөндө Рух-Ордодон ролик тартып калдым. Ал жакта ташка орнотулган колонкалардын кыргыз музыкалары жаңырып турганы мага абдан таасир берген. Караколго келип бул идеяны колдонуу керектигин ойлоп жүрдүм", — деди ал.
Көчө радиосун орнотууну калаа мэри Данияр Арпачиев менен вице-мэр Адыл Каниметов дагы колдоого алган. Демилге "Ысык-Көлдү өнүктүрүү" фондусунун колдоосу менен ишке ашкан.
Медербеков көчө радиосун шаардын башка көчөлөрүнө дагы орнотуу каралып жатканын кошумчалады.
Радиодон кыргыздын элдик чыгармалары коюлат. "Каракол жаңырыгы" көчө радиосу облус аймагындагы мындай форматтагы жападан жалгыз радио болуп саналат.
