Убагында поезд менен товар ташып, базарда иштегендигин өкмөт аппаратынын маалыматтык камсыздоо бөлүмүнүн башчысы Чыңгыз Эсенгул уулу Sputnik Кыргызстан агенттигинин кабарчысына маек куруп жатып билдирди.
Эске сала кетсек, мурдагы премьер-министр Сооронбай Жээнбековдун маалымат катчысы болуп иштеп жүргөн Чыңгыз Эсенгул уулу өткөн жумада өкмөт аппаратынын маалыматтык камсыздоо бөлүмүнүн башчысы болуп дайындалды.
"Мени ар тараптан Кудай колдоп келатат. Анткени атасыз чоңойгон баламын, ал киши мен 1-класста окуп жүргөндө өтүп кеткен. Мени апам менен төрт эжем тарбиялашты. Кийин жашоо-шартка байланыштуу Россияга кетип, 10-11-классты ошол жактан окудум. Андан соң ал жакта базарда иштеп, поезд менен товар ташып жүрдүм. Кантип оокат кылып, жан багыш керектигин ошол жактан үйрөндүм окшойт", — деди Эсенгул уулу.
