БИШКЕК, 19-окт. — Sputnik. Чек ара маселеси боюнча Казакстанга барган кыргыз делегациясынын жарымы сүйлөшүүлөрдү жүргүзүү үчүн Астана шаарында калган. Бул тууралуу биринчи вице-премьер Толкунбек Абдыгулов билдирди.
Белгилей кетсек, Сапар Исаков башында турган кыргыз делегациясы 18-октябрда Казакстанга жумушчу сапары менен барган. Анын жыйынтыгында чек арадагы абалды жеңилдетүү боюнча бир катар келишимдерге жетишилген. Ага ылайык, 19-октябрда саат 00:00дөн тарта казак-кыргыз чек арасынан жөнөкөй адамдардын, жеңил автоунаалардын, бош ири унаалардын ары-бери эркин катташы биринчи орунга коюлган.
"Беш күндүн ичинде кыргыз-казак чек арасындагы абал боюнча кийинки кадамдардын протоколу иштелип чыгып, ал макулдашылышы керек. Андыктан беш күн ичинде биз чек арадагы абалды жөнгө салуу боюнча жол картасын көрсөтө алабыз", — деди Абдыгулов.
Учурда кыргыз-казак чек арасындагы абал туруктуу, жарандар менен жүргүнчү ташыган транспорт жана жеңил автоунаалар тоскоолдуксуз өтүп жатканы өкмөт тараткан билдирүүдө айтылат.
