БИШКЕК, 15-окт. — Sputnik. Саат 10.00гө карата алынган маалымат боюнча шайлоочулардын 6,2 пайызы добуш берди. Бул тууралуу шайлоо боюнча республикалык штабдын башчысы, биринчи вице-премьер-министр Толкунбек Абдыгулов маалымат жыйында билдирди.
Ал ошондой эле чет жактагы шайлоо участкалары өз убагында ачылганын кошумчалады.
Ал эми мамлекеттик каттоо кызматынын башчысы Дастан Догоев жарандардын биометрикалык маалыматтарын окуй турган жабдуулар штаттык режимде иштеп жатканын айтты.
Догоев ошондой эле шайлоочулардын жасалма тизмелери түзүлгөнү боюнча социалдык тармактагы маалымат чындыкка коошпой турганын белгиледи.
Улуттук энергохолдинг компаниясынын директору Айбек Калиев Жайыл районунда трансформатордун майын төгүп кетүү боюнча факты катталганын айтып, ал өз убагында оңдолгонун билдирди. Ошондой эле Токмок шаарында дагы трансформатордун майы уурдалды деген маалымат жалган экенин айтты.
