БИШКЕК, 15-окт. — Sputnik. Памирден келген кыргыздар келерки жумадан тарта Нарын облустук бириктирилген ооруканасында медициналык кароодон өтө баштайт. Бул туурасында өкмөттүн Нарын облусу боюнча өкүлүнүн маалымат катчысы Айнура Дүйшөк кызы кабарлады.
Жол жүрүп келген кандаштар менен жолуккан Аманбай Кайыпов алардын ал-абалын сурап, мындан ары да көрүлө турган камкордуктар тууралуу айткан. Ал памирликтер жайгашкан палаталарда болуп, санитардык-гигиеналык шарттарын көрүп, пикир алышып, сунуштары, каалоо-тилектери болсо аткарууга даяр экенин билдирген.
"Жолдон чарчап келдиңиздер эле. Бүгүн маанайыңыздар жакшы экен. Элибиз сиздерди сурап, салам айтып жатышат. Маселеңиздер болсо тартынбай оюңуздарды ортого салып, сунуш айтыңыздар. Аткарууга даярбыз", — деди облус башчы.
Нарын облустук бириктирилген ооруканасынын директору Мурат Атбаевдин айтымында, Кичи жана Чоң Памирден келген кыргыздардын ден соолугу негизинен чың эле.
Кайыпов медициналык кароодон өткөндөн кийин балдардын билим алуусуна өзгөчө көңүл буруларын айткан.
Эске салсак, кыргыз өкмөтү Афганистандагы Кичи жана Улуу Памирди жердеген 33 этникалык кыргызды билим берүү максатында Нарынга алып келип жайгаштырды.
