БИШКЕК, 14-окт. — Sputnik. Өлкө башчы Алмазбек Атамбаев өз акчасын президенттик фондго жумшаарын айтты.
Анын билдирүүсүнө караганда, президенттин фондунда мамлекеттик бюджеттен алынган каражат жок.
"Талас театрынын курулушуна кеткен 45 миллион сом же оңдоп-түзөө иштерине жумшалган 70 миллион жана башка акчалардын бардыгы мамлекеттик бюджеттен алынган эмес. Бул каражатты силердин президентиңер ар кайсы ишкерлерден чогулткан. Азырынча бир дагы жергиликтүү ишкер бул фондго акча жумшай элек, ал тургай Талас театрынын курулушуна беришкен жок. Бул жаатта бизге чет элдик, анын ичинен көбүнчө россиялык ишкерлер жардам берүүдө. Аларга рахмат. Оюмча биздикилер да эми үйрөнө баштайт болуш керек. Мен Балыкчыга гемодиализ борборун ачкан баланы билем жана ал жасаган иши үчүн сыйланган. Президенттик фондго өзүм да акча салып турам. Себеби башкаларга канчалык жардам берсек, Кудай кур калтырбайт", — деди Атамбаев.
Өлкө башчысы ишемби күнү Улуттук онкология жана гематология борборунун жаңы комплексинин пайдубалын түптөө аземине катышты.
