БИШКЕК, 10-окт. — Sputnik. Кыргызстандыктар психиатрлардан жардам алуудан тартынбашы керек. Бул тууралуу Республикалык психикалык саламаттык борборунун директору Ураимжан Исмаилов билдирди.
Эл аралык психикалык саламаттык күнүнө карата Sputnik Кыргызстан агенттигинин мультимедиалык маалымат борборунда видео көпүрө болуп өттү.
"Көпчүлүк кыргызстандыктар психиатриялык жардам алуудан тартынышат. Ал эми коомчулук психиатрга кайрылган адамдарды сөөмөйү менен көрсөтүшөт. Жакын адамынын кылык-жоругу өзгөрүп калганын байкаган адам аны психиатрга алып келиши керектигин түшүндүрүүгө аракет жасап жатабыз. Ал эми жалпы коомчулук мындай адамдарга түшүнүү менен мамиле жасашы керек", — деди Исмаилов.
Видеоконференция Баку, Астана, Минск, Кишинев жана Бишкекти байланыштырды.
