Казак премьери: эч нерсеге карабай, кыргыз эли менен жакшы мамиледе калабыз

БИШКЕК, 9-окт. — Sputnik. Казакстандын премьер-министри Бакытжан Сагинтаев Кыргызстандын президенти Алмазбек Атамбаевдин 7-октябрда казак бийлиги тууралуу айткандары боюнча билдирүү жасаган. Бул туурасында Tengrinews.kz сайты жазды.

"Кыргызстандын президенти Алмазбек Атамбаев 7-октябрда бир нече орунсуз жана достук эмес маанайдагы билдирүү жасап, Казакстандын социалдык-экономикалык жагдайына тийишкен кеп айтты. Кыргызстан менен эки тараптуу өнүгүп келе жаткан мамилелерди эске алуу менен КР президентинин шайлоолор алдындагы жоопкерчиликсиз, чагымчыл жана жалган сөздөрү эки элдин ынтымагына шек келтирбеши керек деп ойлойм", — деп айтылат маалыматта.

Андан ары казак өкмөт башчысы Казакстандын экономикасынын өнүгүшү туурасында көлөмдүү маалыматтарды берген.

Сагинтаев Казакстан кыйын күндөрдө кыргыз эли менен болгон, социалдык-экономикалык көйгөйлөрүн чечкенге көмөк көрсөтүп, гуманитардык жардам кылган деген билдирүүсүн жазган.

Казак премьер-министри гуманитардык көмөктүн алкагында Кыргызстанга 20 миллион доллар каралып, ага Ош менен Бишкекке мектеп тургузулгандыгын эске салган.

"Казакстандык инвесторлордун кыргыз экономикасына салган инвестициясы 820 миллион долларды түзүп, анын аркасынан миңдеген кыргызстандыктар жумуш менен камсыз болууда", — деп жазылган анын билдирүүсүндө.

Ал сөзүнүн аягында эки тараптуу мамилелердин келечеги туурасында да айткан.

"Атамбаевдин бир нече ирет жасаган мындай билдирүүлөрүнө карабастан, казак өкмөтү кыргыз-казак стратегиялык өнөктөштүгүн, кызматташтыгын кеңейтип жана тереңдетүү ниетинде", — деп аяктаган билдирүүсүн казак өкмөт башчысы Сагинтаев.

Эске салсак, 7-октябрда кыргызстандыктарга мамлекеттик сыйлыктарды тапшырып жатып, президент Атамбаев казак бийлиги жана андагы бир катар адамдар туурасында кескин пикирин билдирген.