Акыйкатчы 23 миң долларга машина сатып алуу боюнча түшүндүрмө берди

БИШКЕК, 9-окт. — Sputnik. КР акыйкатчысы Кубат Оторбаев 1 миллион 576 миң сомго (23 миң доллардай) автоунаа сатып алуу боюнча тендер тууралуу пикирин билдирди.

4-октябрда Акыйкатчы институту жол тандабас сатып алуу боюнча тендер жарыялаган.

Мамлекеттик сатып алуулар порталында кандай машина сатып алынары так жазылган эмес. Болгону анын түсү боз, күмүш түстүү же ак болушу керектиги белгиленген. Тендерге катышуу үчүн билдирүүлөрдү 25-октябрга чейин берүү кажет. Социалдык тармактын колдонуучулары кымбат баалуу автоунаанын сатып алынышын каражатты үнөмсүз пайдалануу катары баалашкан.

Оторбаев Акыйкатчы институтунун автопаркы көптөн бери жаңыланбагандыктан машина сатып алуу муктаждыгы келип чыкканын Sputnik Кыргызстан агенттигине берген маегинде билдирди.

"15 жылдан бери машина сатып алуу боюнча биринчи жолу тендер жарыяланууда. Биздин автоунаалар аябай эскирди. Каражат бюджетте каралгандыктан тендер жарыяладык. Менимче бул орто эле базар баасында бааланган", — деди ал.

Коомдун терс пикиринен улам тендер жокко чыгарылабы деген суроого командировкада болгондуктан жарандардын ой-пикири менен тааныша электигин айтты. Акыйкатчы бул боюнча кийинчерээк толук маалымат берем деп сөз берди.