БИШКЕК, 25-сен. — Sputnik. Башкы прокуратуранын мурдагы имараты жарабай калгандыктан аны оңдоо үчүн жарыяланган тендер токтотулду. Бул тууралуу Капиталдык курулуш башкармалыгынын жетекчи орун басары Койчогул Ибраимов Sputnik Кыргызстан агенттигине билдирди.
Буга чейин мэрия 2010-жылдын 7-апрелинде күйүп кеткен Киев жана Орозбеков көчөлөрүнүн кесилишиндеги имаратты оңдоо үчүн тендер жарыялаган. Аны оңдоо үчүн шаардык бюджеттен 120 миллион сом бөлүү каралган.
Ибраимовдун айтымында, курулуштардын сейсмикалык туруктуулугу жана инженердик долбоорлоо мамлекеттик институту экинчи корутундусунда жаан-чачындан жана температурадан улам аталган имарат дубалдарынын 70-80 пайызы жараксыз абалга келген.
"Тендерди жокко чыгаруу чечими кабыл алынды. Эми имаратты түрттүрүш керек", — деди ал.
Ибраимов аталган имараттын ордуна эмне салынары азырынча белгисиз экенин баса белгиледи.
