БИШКЕК, 4-окт. — Sputnik. Шаар тургунунун арызынан жана премьер-министрдин тапшырмасынан кийин Дөлөн Өмүрзаков атындагы стадиондун аймагы жарыктандырылып, кирүү үчүн алынган акы токтотулду.
Вот так и бегаем на стадионе Спартак. В абсолютной темноте.
— Ажара (@azhar__m) 25 сентября 2017 г.
Вокруг горят огни баров, ресторанов. А стадион во мраке. pic.twitter.com/0eotCkfxkQ
Буга чейин шаар тургуну Ажар Алапаева стадиондун аймагында жарык жок экенин, ал чуркагандар үчүн ыңгайсыздык жаратып жатканын социалдык тармакка жазган. Анын айтымында, башкы спорт аренасынын аймагына кирип чуркоо үчүн айына 200 сом алынып келген.
Кийин ал өкмөт башчы Сапар Исаковго социалдык тармак аркылуу кайрылып, аталган маселеге көңүл бурууга чакырган.
Шаар тургунунун кайрылуусуна премьердин жардамчысы Бермет Турсункулова жооп берип, өкмөт башчы маселе менен таанышканын айтып, жакын арада көйгөй жоюларын айткан.
Агенттиктин башчысы Канат Аманкулов шейшемби күнү өзү келип жарыктандыруу системасын карап кеткен. Ал ошондой эле кошумча жарык берүү тапшырмасын берген.
Аманкуловдун айтымында, эми эртең мененки саат 6:00дөн тарта 21:00гө чейин стадионго кирүү акысыз болот.
Агенттик эгер кандайдыр бир акча талап кылуулар болсо 0 (312) 32-45-12 номери аркылуу кайрылуу керектигин шаар тургундарына эскертет.
