БИШКЕК, 30-сен. — Sputnik. Премьер-министр Сапар Исаков Россияга жасаган расмий иш сапарынын алкагында Белгисиз жоокердин бейитине гүлчамбар коюп, "Сколково" инновациялык борборуна барды. Бул туурасында өкмөттүн маалымат кызматы кабарлады.
Кыргыз делегациясы Белгисиз жоокердин бейитинде Улуу ата мекендик согуш учурунда курман болгон жоокерлерди эскерди. Ардак кароол өтүп, аза мүнөтү болду.
Исаков баштаган делегация эл аралык "Сколково" гимназиясына барды. Андан соң мектепке чейинки жана мектеп жашындагыларга билим берүүнүн сапатын жакшыртуу максатындагы борбордун иши менен таанышты. Окуу борбордо делегацияны Россия өкмөтүнүн төрагасынын орун басары Аркадий Дворкович менен Байланыш жана массалык коммуникация министри Николай Никифоров коштоп жүрдү.
Булардан кийин Исаков россиялык бир катар жалпыга маалымдоо каражаттарына — "Россия 24" телеканалына, "РИА Новости" маалымат агенттигине жана "Россиялык гезитке" маек берди.
Бул 1991-жылдан бери кыргыз премьеринин Россияга болгон биринчи расмий иш сапары. Буга чейинки өкмөт башчылар аталган өлкөгө жумушчу сапар менен гана барышкан.
Кыргыз делегациясынын расмий курамында тышкы иштер министри Эрлан Абдылдаев, вице-премьер Дүйшөнбек Зилалиев, Кыргызстандын РФтеги элчиси Болот Отунбаев, экономика министри Артем Новиков, Маалыматтык технологиялар жана байланыш боюнча мамлекеттик комитеттин жетекчиси Нурбек Абасканов, Миграция боюнча мамлекеттик кызматтын төрагасы Медетбек Айдаралиев, премьер-министрдин кеңешчиси Талант Султанов, өкмөттүн эл аралык кызматташуу боюнча бөлүмүнүн жетекчиси Айбек Айдарбеков бар.
