БИШКЕК, 29-сен. — Sputnik. Бүгүн Бишкек шаарында жергиликтүү дарыгерлер Европалык онкология мектебинин адистери менен биргеликте Кыргызстандагы рак илдетин көзөмөлдөө программасын талкуулашат. Бул тууралуу иш-чаранын уюштурган "Эргене" коомдук фондусунан билдиришти.
Аталган фонддун төрайымы Таалайгүл Сабырбекованын айтымында, акыркы жылдары өлкөдө онкологиялык оорулардын саны өсүп, алардын арасында эмчек рагы лидер бойдон калууда.
Тегерек столдун жүрүшүндө европалык адистер Кыргызстандын шартында жеткиликтүү болгон диагностика жана ракты дарылоо ыкмалары боюнча тажрыйбалары менен бөлүшөт. Ошондой эле бул тармакка инвестиция жана гуманитардык жардам тартуунун жол-жоболорун айтып беришет.
Иш-чарага саламаттык сактоо министри Талантбек Батвралиев, Улуттук онкология борборунун кызматкерлери, Жогорку Кеңеш депутаттары катышат.
