БИШКЕК, 29-сен. — Sputnik. Баткен шаарында орус тилдүү мектепте орун жетишпей, бир класста элүү бала билим алууга аргасыз. Бул тууралуу шаардык билим берүү бөлүмүнүн башчысы Абдилла Ахматбеков Sputnik Кыргызстан агенттигине билдирди.
Анын айтымында, учурда калаада орус тилинде билим берүүчү бир гана мектеп бар. Ал эми жалпы шаар боюнча тогуз мектеп иштейт.
"650гө жакын орунга ылайыкташкан Жоомарт Бөкөнбаев атындагы орто мектепте ушул тапта 1500 окуучу окуп жатат. Ал эми 1-класска быйыл 300 окуучуну кабыл алдык. Негизи калаадагы тогуз орто мектепке орус тил класстарын ачуу пландалган. Бирок орус тилдүү мугалимдердин жетишсиздигинен иш оңунан чыкпай келет", — деди Ахматбеков.
"Класстык бөлмөлөр 30 окуучуга гана ылайыкташканына карабай, 50дөн баланы окутууга аргасыз болуп жатабыз. Мындайда окуучуларга гана эмес, мугалимдерге да сабак өтүү кыйын болуп калат. Өткөн жылы класс жетишсиздигинен ата-энелер тарабынан мектептин коридоруна кошумча класстык бөлмө уюштурулган", — деди мектептин мугалими Жумагүл Ысманова.
Баткен шаарында жалпы 5343 окуучу болсо, анын 1,5 миңи орус тилдүү мектептен билим алат.
