БИШКЕК, 27-сен. — Sputnik. Жоголуп кеткен израилдик кызды издөө үчүн Кыргызстанга Тель-Авивден куткаруу тобу келгенин The Times of Israel басылмасы жазып чыкты.
22 жаштагы Хилла Ливнени издөө иштери Жалал-Абаддын Аксы районунда жүрүп жатат. Турист кыз достору менен Борбор Азия мамлекеттерин кыдырып жүргөн. Акыркы ирет аны 23-сентябрь күнү Сары-Челек коругунан көрүшкөн. Кыздын жоголгону тууралуу маалымат ӨКМге шейшемби күнү түшүп, аталган аймакка 10 куткаруучудан турган топ чыгып кеткен.
Басылманын жазганы боюнча Израилдин Алматы шаарында жайгашкан консулдугундагы элчисинин орун басары Ариэль Браверман Германия элчилигинин аскер атташесине кайрылып, издөө иштерине аскер тик учагын тартуу өтүнүчүн билдирген.
