БИШКЕК, 26-сен. — Sputnik. Кубандан денеси жиликтенген аялдын сөөгү табылып, анын өлүмүнө башка бир жубайлар шектелип жатат. Бул туурасында Россиянын тергөө комитетинин Краснодар аймагы боюнча бөлүмү билдирди.
Тергөөнүн маалыматтарына караганда, 8-сентябрда 35 жаштагы киши аялы экөө Гастелло көчөсүндө жайгашкан ээн калган жерде чоочун аял менен таанышып, ал жерден ичишкен. Андан соң айтыша кетишип, эркек киши жаңы таанышкан аялды өлтүрүп салган.
"Эркек киши чоочун аялдын денесин жиликтеп, кээ бирлерин ичкен жерге калтырып, бир катарын жерге көмгөн. Кылмыштан соң ал маркумдун жиликтенген сөөктөрү менен өзүн чөнтөк телефонуна сүрөткө тарткан. 11-сентябрда шаардагы көчөнү оңдоп жатканда жолчулар ал аппаратты таап алып, сүрөттөрдү көргөн соң полицияга беришкен", — деп айтылат Тергөө комитетинен.
Иликтөө иштери учурунда аялы-күйөөсү жашаган жатканадан адамдын тузга чыланган органдары табылган. Андан сырткары, ашканадан тамак-аш жана тоңдурулган, бирок эмне экендиги белгисиз эттер алынган. Полиция андан ары издеп, жер төлөдөн жана ошол жерлерден маркум аялдын сөөгүнүн калдыктарын тапкан.
Бул факты боюнча кылмыш иши козголуп, ишти андан аркы иликтөөгө жиберилген.
