"Москва" соода борборунун жанындагы башаламандыктан кийин 250дөн ашык киши кармалды. Бул тууралуу РИА Новости агенттиги КМШнын мигранттар федерациясынын башчысы Каромат Шариповго таянуу менен билдирди.
Анын айтымында, так маалыматтар жок. Себеби кармалган кишилер полициянын ар кыл бөлүмдөрүнө жеткирилген. Ал ошондой эле айрым полиция бөлүмдөрү канча киши кармалганы тууралуу маалымат берүүдөн баш тартып жатканын кошумчалады. Шарипов, андан сырткары, чырдын чыгышына себепчи болгон сабалды делген жүк ташуучу киши тууралуу да эч кандай кабар жок экенин баса белгиледи.
Шаршемби күнү кечинде "Москва" соода борборунун жанында ондогон мигранттардын катышуусу менен чыр чыккан. Жаңжалдын чыгуусуна соода борбордун биринин күзөтчүлөрү тажик жаранын эс-учун жоготкуча сабап салганы себеп болгону айтылууда.
