БИШКЕК, 21-сен. — Sputnik. Аялдар жеке маселеси жана көйгөйү менен казыяттарга түзмө-түз кайрыла алат. Бул тууралуу Кыргызстандын муфтийи Максатбек ажы Токтомушев борбор калаада өткөн "Аялдардын коомдогу жана исламдагы орду" аталышында семинарда билдирди.
Иш-чарага 100дөн ашык мамлекеттик кызматкер, мугалим, дарыгер жана социалдык кызматкерлер менен маек курду.
"Атайын буйрук чыгарганбыз. Ага ылайык, аймактагы казыяттарга аялдар диний, үй-бүлөлүк жана жеке маселеси менен кайрыла алат. Ошондой эле апталык сабактарды, айлык семинарларды өткөрүү милдети жүктөлгөн. Бул аракеттер улуттук баалуулуктарды эске алуу менен динди үйрөтүүгө, экстримизм, террорчулукту алдын алууга багытталган", — деди муфтий.
Иш-чарага "Ыйман" фондусунун жетекчиси Нуржигит Кадырбеков, Дин иштери боюнча мамлекеттик комиссиянын директору Зайырбек Эргешов дагы катышып, мындай семинарлар өлкөнүн бардык аймактарында өтөрү айтылды.
