БАТКЕН, 20-сент. — Sputnik. Зыянкечтерди жок кылуучу каражаттардын түрүн өндүргөн биологиялык фабрика негизделип, иштей баштады. Бул тууралуу Айыл чарба, тамак-аш өнөр жайы жана мелорация министирлигинин "Кыргыз Агро" борборунун директору Жаңыбай Туманов Sputnik Кыргызстан агенттигине билдирди.
Анын айтымында, өндүрүлгөн каражаттар азырынча сатыкка чыга элек. Алгачкылары дыйкандарга акысыз таркатылат.
"Биологиялык фабрикадан өндүрүлгөн каражаттар бир гана Баткен облусун камсыз кылбастан, кошуна Тажикстан, Өзбекстанга да сатылат. Ал үчүн учурда кошуна өлкөнүн тиешелүү тармактары менен сүйлөшүүлөр жүрүүдө", — деди Туманов.
Биофабриканын негиздөөчүлөрү алгачкы өндүрүштү жергиликтүү дыйкандарга акысыз берип натыйжалуулугун билүүнү көздөп жатышат.
Ишканада айына 38 тонна микро биопрепарат, 60 миллион даана зыянкечке каршы жандык өндүрүлөт. Химикатсыз каражаттарды быйылкы күзгү үрөндөргө пайдалануу пландаштырылууда. Колдонууга чыга баштаса биофабриканын курулушуна сарпталган 14 миллион сом үч жыл аралыгында өзүн актайт.
Эске салсак, 19-сентябрь күнү вице-премьер Дүйшөнбек Зилалиев иш сапары менен Баткен облусуна келип, фабриканын ишмердүүлүгү менен таанышкан.
