Улуттук госпиталдын кулак-мурун оорулары бөлүмүнүн дарыгери Жолчубек Жумабековдун айтымында, эгер адам сасык тумоолоп калса, үй шартында дарыланып жүрө бербей сөзсүз ооруканага кайрылуусу зарыл. Антпесе оору өтүшүп кете турган болсо, аягы аянычтуу болуп калат.
"Бардык эле адам сасык тумоолойт. Бирок айрымдары оору өтүшүп кеткиче өзү билген дарыларын ичип, качан гана болбой калганда ооруканага барат. Сасык тумоо өтүшүп кетсе мурун, кулак жана тамак ооруларын козгойт. Аларды жакшы дарылабаса оору өнөкөткө айланып отит, гайморит сыяктуу дарттар келип чыгат. Бул ооруларды дарылоо көпкө созулуп калат. Андыктан сасык тумоону оңой оору деп кабылдабаш керек", — деди Жумабеков.
Ал эми №14 үй-бүлөлүк медицина борборунун балдар дарыгери Гүлнара Жумадылова балдарды оорутуп албаш үчүн аларды сергек жашоого көндүрүш керектигин айтты.
Адистер ошондой эле жашы өтүп калган жана өнөкөт оорулар менен ооруган адамдар сасык тумоодон жакшылап сактаныш керектигин баса белгилеп, оорунун алдын алуу үчүн эмнелерди эске алуу керектигин түшүндүрүп беришти.
Сергек жашоо. Адам канчалык дене тарбия менен алектенип өзүн сергек алып жүрсө, көп оорунун, анын ичинде сасык тумоонун да алдын алат. Жок дегенде үй шартында деле буту-колду чоюп же эртең мененкисин чуркап коюу да дартты жанга жолотпойт.
Туура тамактануу. Тамак иммунитетти жакшыртат. Ал эми иммунитети күчтүү адам көп оорубайт. Андыктан кичине баладан тарта чоң кишилерге чейин убагында тамактанып туруу — оорудан оолак болуунун бир жолу.
Үйдү, иштеген жерди таза кармоо. Сасык тумоо мезгили башталганда үйдү көбүрөөк суулап жууп-тазалап жана тез-тезден желдетип туруу зарыл. Анткени оорунун инфекциясы чаң жерде көп убакытка чейин сакталат.
Маска тагынуу. Сасык тумоо мезгили башталганда көпчүлүк отурган жерде (мектеп, жумуш) маска тагынып алган дурус. Аны бир саатка чейин тагынып жүрө бербей тез-тезден алмаштырып турган оң.
Эмдөө. Азыр сасык тумоону алдын алуучу эмдөө бар. Мындан улам эртелеп эле эмделип койгон туура.
