БИШКЕК, 16-сен. — Sputnik. Төө-Ашууда бензовоз күйүп жатканын күбө Sputnik Кыргызстан агенттигине билдирди.
Анын айтымында, окуя 16-сентябрда саат 10:00дөр чамасында болгон жана ал жабыр тарткандарды көрбөгөнүн кошумчалады.
"Бензовоздун жанынан эч кимди көргөн жокмун. Болгону биздин жаныбыздан бир киши өткөнүн көрдүк. Мен эмне болгонуна кызыгып, айдоочу кайда экенин сурадым. Ал эч нерсе билбей турганын айтты. Жарылып кетүү коркунучунан улам айдоочулар ага жакындаганга даабай турушту", — деди күбө.
ӨКМдин алдын ала берген маалыматына ылайык, жабыркагандар жана каза болгондор жок. Бензовоз Бишкек — Ош жолунун 100-чакырымында күйгөн. Өрт өчүрүүчүлөр тартылган эмес, себеби автоунаа таандык болгон компания өз мойнуна алган. Өрт эмнеден улам чыкканы белгисиз.
