БИШКЕК, 16-сен. — Sputnik. Шайлоо маалында административтик ресурстарды колдонгондорго карата катуу чара көрүлөт. Бул тууралуу өкмөттүн маалымат кызматы кабарлады.
Вице-премьер-министр Дүйшөнбек Зилалиевдин айтымында, мыйзам бузууларга тиешелүү чара көрүү милдети өкмөткө жүктөлдү.
"Коопсуздук кеңешинин 11-сентябрда кезектеги отуруму өттү. Анда президенттик шайлоону өткөрүү негизги маселелердин бири катары каралды. Кеңештин чечими боюнча админстративтик ресурстарды пайдаланган мамлекеттик жана жергиликтүү өзүн-өзү башкаруу органдарынын жетекчилеринин аракетине чара көрүү милдети өкмөткө жүктөлдү", — деди Зилалиев.
Ошондой эле ал шайлоо комиссияларынын ишине жергиликтүү бийлик өкүлдөрү, мамлекеттик администрациялардын кийлигишүүсүнө тыюу салынгандыгын кошумчалады.
Эске сала кетсек, президенттик шайлоо 2017-жылдын 15-октябрында өтөт. Ага 13 талапкер ат салышууда.
