БИШКЕК, 8-сен. — Sputnik. Акыркы күндөрү күндүн атмосферасында болуп жаткан майда жарылуулар уюлдук байланышка сезилээрлик таасир тийгизе албастыгын Жусуп Баласагын атындагы КУУнун доценти, физик Рахманберди Ибрагимов Sputnik Кыргызстан маалымат агенттигине билдирди.
Эскерте кетсек, бүгүн күндүн атмосферасында дагы бир ирет майда жарылуу болгондугун ЖМКлар РФтин Илимдер академиясынын Физика институтуна таянып жазып чыккан.
"Күндүн атмосферасында майда жарылуулардан бөлүнүп чыккан электромагниттик толкун тараганда жердин магниттик талаасында чыңалуу пайда болот. Анын кесепетинен теле, радио сигналдар, байланыш начарлашы мүмкүн. Бирок бул бардык эле электрондук жабдууларга таасир бере бербейт. Мисалы, уюлдук байланыштын радио толкундары абдан кыска, миллиметрден да төмөн болгондуктан магниттик бороонго илинбей калышы толук ыктымал", — деди окумуштуу.
Анын айтымында, майда жарылуудан бөлүнгөн толкундардын көпчүлүгү жерге жеткенге чейин күчүн жоготуп коюшу толук мүмкүн.
Мурдараак окумуштуулар жерде 4-5 баллга жеткен магниттик бороон болорун билдирген. Бирок акыркы маалыматтарга караганда, анын күчү айтылгандан 10 эсеге жогору болуп турат.
Адатта жаратылыштын бул кубулушу адамдын ден-соолугуна жана байланышка бир топ таасир этери айтылып келет.
