Президент Алмазбек Атамбаев балдар билим алууну эң биринчи кезекке коюшу керектигин Чоң-Таш айылында Сүймөнкул Чокморов атындагы мектептин ачылышында сүйлөп жатып билдирди.
"Эң биринчи кезекке билимди коюш керек. Куранды он жолу окусаңар да кыздардын башына кара мүшөк кийгизгиле деп жазылган жери жок. Аны биздин сакалын сербейткен чала молдолор айтат. Эки-үч күн мурун эле Абдил Сегизбаевдин (УКМК — ред.) балдары төрт жаш баланы кармап, экөөнү жок кылды. Булар Казакстандын жана биздин жарандар экен. Чала молдолор алардын да башын айландырып койгон", — деди Атамбаев.
Мындан сырткары, ал өзүнүн жаш кезиндеги билимге болгон умтулуусун айтып берди.
"Мен төрөлгөндө атам 60ка, апам 45 жашка чыгып калган эле. Ошондо атам "эң кичикейибиз Алмаз окубай эле жаныбызда калсынчы" деп айтканда апам ага көнбөй окуткан. Мен чөп чапканды, багбанчылыкты, эгин сугарганды жакшы көрчүмүн, эгер апам окутпаганда сугатчы болмокмун", — деди өлкө башчы.
Ошондой эле ал окуучу кезинде штанга көтөрүүгө, күрөшкө, бокска кызыгып жүргөндө апасы "билектүү бирди жыгат, билимдүү миңди чыгат" деп билим алууга үндөгөнүн кошумчалады.
