БИШКЕК, 28-авг. — Sputnik. Москвадагы "Печатный экспресс" басмаканасынан чыккан өрттөн каза болгон кыргызстандык кыз-келиндердин бир жылдыгына карата эскерүү иш-чарасы болуп өттү. Бул тууралуу Кыргызстандын Россиядагы элчилигинен маалымдашты.
Билдирүүгө ылайык, ага Москвадагы кыргыз элчилигинин жана диаспоранын өкүлдөрү, жарандык активисттер, аксакалдар кеңеши, ошондой эле каза болгондордун туугандары катышты. Тилсиз жоонун айынан ажал тапкан кыз-келиндердин жакындарына көңүл айтылып, арбактарына багышталып куран окулду.
Москва шаарынын Бутырский райондук соту басмкананын башкы директору Сергей Москвинди эки жыл алты айга, инженери Антон Яцковду үч жыл алты айга эркинен ажыраткан.
Кийинчерээк кыргызстандык кыз-келиндердин туугандары сот жумшак өкүм чыгарып койду деп нааразы болуп доо арыз берилген.
Мындан тышкары, элчилик каза болгон жарандардын туугандарына компенсация төлөп берүү маселеси боюнча Россиянын тийиштүү органдары жана адвокаттар менен иштөөнү улантып жатканын кабарлады.
