БИШКЕК, 28-авг. — Sputnik. Бишкек шаарында көптөгөн батирлерге уурулукка кирүүгө шектелген Казакстандын жараны кармалды. Бул тууралуу ИИМден кабарлашты.
Билдирмеге караганда, шектүү Бишкектин жогорку жагындагы кичи райондордо жайгашкан көп кабаттуу үйлөрдөгү батирди тоноого аракет кылган.
"Шектүү киши көп кабаттуу үйдөгү батир кайтарууда экенин байкабастан уурулукка кирген. Күзөт кызматындагыларга белги түшөр замат жерине жетип келип, үйдүн сыртынан байкоо салышкан. Натыйжада белгисиз адам шашып тепкичтер менен түшүп келе жатканын байкашкан. Сырткы эшик ачылар замат ал качып кетүүгө аракет жасаган. Бирок милиционерлер буга жол берген эмес", — деп айтылат маалыматта.
Текшерүү учурунда жогорку кабаттагы батирлердин биринин сырткы эшиги ачылып калганы аныкталган. Шектүү катары 32 жаштагы Казакстандын жараны кармалып, ага карата Кылмыш жаза кодексинин 28-164-беренелери (уурулук жасоо) боюнча кылмыш иши козголду. Ал буга чейин да бир катар батирлерди тоноого шектелүүдө.
