Балбан кыз Айсулуу Тыныбекова күрөш боюнча дүйнөлүк чемпионатта коло байге алып, Кыргызстандын намысын алыскы Париж шаарында татыктуу коргоду. Эми Айсулуунун дүйнөлүк чемпион болуп каларында шек жок. Себеби, ал бул мелдеште өзүнүн шамдагайлыгын, чапчаңдыгын көрсөтө алды.
Ал эми Дарья Маслова аттуу жөө күлүгүбүз Кытайда өтүп жаткан универсиадада алтын медаль тагынып, Кыргызстандын желегин дүйнө элине тааныта желбиретти. Дарья дагы дүйнө чемпиону болууга толук татыктуу. Себеби, бул спортчу азыр баралына келип турат. Арышты кенен таштап, болгон күчүн эми дүйнө мыктысы болууга жумшайт деп ишенгибиз келет.
Кыргыздын башына каран күн түшкөндө эки чылбыр бир тизгинди колго алып, кыйчалыш маалда эл башкарып, Орто Азияда биринчи жолу аял президент болгон Роза Отунбаева 23-августта 67 жашка чыкты. Отунбаева канчалык эл оозуна алынса да, анын айрым сырларын бул жакка тизмектеп жаздык. Ии баса, Роза айымдын аты башында Ырыскан экенин билчү белеңер?
Ак илбирс кантип жан сактайт деп кызыгып жатсаңыз, биздин бул видеону көрүңүз. Ысык-Көлдөгү корукта багылып жаткан ак илбирстерди жана башка жаныбарларды көрүп, жаратылыш койнуна барып келгендей эле болосуз. Адистердин акыркы маалыматы боюнча Кыргызстандын тоолорунда ак илбирс көбөйө баштаган. Оозуңарга май!
Валюта наркы. Сомдун баасы долларга карата орто эсеп менен 68.33 (сатып алуу) жана 68.65 (сатуу) сомду түздү.
Мунай баасы. Бишкекте орточо эсеп менен алганда АИ-92 үлгүсүндөгүсү 38.60 сом, АИ-95 үлгүсүндөгүсү 41.20 сом, ал эми дизель майы 36.60 сомдон сатылууда.
Соңку сөз. Кыргызстанды дүйнөгө жакшы жагынан таанытып, башкаларды суктандыралы деп Расул Үсөналиев.
