БИШКЕК, 18-авг. — Sputnik. Премьер-министр Сооронбай Жээнбеков улуу жазуучу Чыңгыз Айтматовдун 90 жылдык мааракесин өткөрүү боюнча уюштуруу комитети менен жолугуп, пландарды талкуулады. Бул тууралуу өкмөттүн маалымат кызматы билдирди.
Анда III Ысык-Көл интеллектуалдык форумуна киргизиле турчу кошумчалар, Айтматовдун чыгармаларын окуган чет элдиктердин видеосун уюштуруу, эл аралык театр фестивалдарын, кино күндөрүн өткөрүү талкууланган.
Жээнбеков жазуучунун мааракесин татыктуу өткөрүү керектигин баса белгилеп, ага жоопкерчилик менен даярдыктарды көрүү зарылдыгын айтты. Коюлган планды ишке ашыруу үчүн Каржы министрлигине акчаны учурунда бөлүү милдеттендирилди.
Улуу жазуучунун көзү тирүү болгондо эмдиги жылы 90го чыкмак. Ал 1928-жылы 12-декабрда төрөлүп, 2008-жылы 10-июнда каза болгон.
