Жол кырсыктары көп катталып жаткандыктан, региондорго эл ташыган таксилерди лицензиялоо маселеси каралып жатат. Бул тууралуу Транспорт министрлигинин алдындагы Автотранспорт агенттигинин директорунун орун басары Максат Жумабаев билдирди.
"Учурда аймактарга каттаган таксилерди бир дагы мамлекеттик орган көзөмөлгө ала элек. Алардын ишин тартипке салуу боюнча мыйзамга өзгөртүү киргизүү маселеси козголгон. Ага ылайык шаарлар аралык каттамдарды аткарам деген фирмалардын жана айдоочулардын иши лицензия жолу менен жөнгө салынат. Бул мыйзам калктуу конуштан 60 чакырым алыстыкка жүргүнчү ташыган бардык унааларга тиешелүү болот", — деди Жумабаев.
Анын айтымында, азырынча министрлик региондорго каттаган автобустар менен маршруткаларды гана лицензиялайт. Алардын каттамдарын бекитип берүү дагы министрликтин мойнунда. Ал эми таксилерди эч ким көзөмөлдөбөйт.
Транспорт жана жол министрлигинен билдиришкендей, өлкөнүн түндүк аймагындагы облустарга каттамдарды жеке фирмалар аткарат. Буга укук алуу үчүн беш жыл сайын министрлик өткөргөн сынакка бир нече ишкана катышат.
Лицензия алуу үчүн кандай талапка жооп бериш керек?
Айдоочуну жумушка алуу же кетирүү — фирманын ички иши болуп эсептелет. Бирок эл ташып иштейм деген айдоочу Транспорт министрлигинин автотранспорт агенттигинен лицензия алуусу зарыл.
Ал үчүн айдоочунун үч жылдык стажы жана жаш курагы 21-22ден жогору болушу керек.
Бир фирмага бириккиси келбеген таксисттер
20 жылдан бери Бишкек — Кербен каттамында жүргүнчү ташып иштеген Ажыбек Акуловдун айтымында, иштөөгө уруксат алуу үчүн таксисттер бир айга 500 сомго патент, 380 сомго коопсуздук полисин алышат.
"Лицензиялоо же бир фирмага башыбызды бириктирүү ишке ашпай турган нерсе деп эсептейм. Анткени мунун баары айдоочунун мойнуна илине турган чыгымдар. Анын үстүнө бюрократия башталат. Мисалы, мага кечки саат 10до капысынан кардар табылып калса, жолго чыгууга уруксат берген кагазга мөөр басчу киши эртең менен кел деп коет. А кардар күтүп отурмак беле? Анан айласыздан мөөр басчу адамдын чөнтөгүнө акча саласың", — деди Акулов.
Ал эми таксисттердин катышуусу менен болгон жол кырсыктарына жолдун начарлыгы жана иштөөгө шарттардын жоктугу себепкер деп эсептейт.
Бишкек менен башка шаарларды байланыштырган маршруттар
Бишкектин Батыш автобекетинен эртең мененки саат 8.30да Ала-Букага, 9.30да Кербенге маршрутка кетет.
Ал эми Чыгыш автобекетинен Чүйдүн бардык шаарларына жана райондоруна чакан автобустар каттайт. Алар саат 7.00дөн 19.00гө чейин элдин толушуна жараша жолго чыгат.
Түштүк региондоруна каттаган таксисттер Ош базарынын аймагында турат. Ош облусуна же шаарына барчуларды Токтогул менен Кулиев көчөлөрүнүн кесилишинен, Жалал-Абад тарапка кетчүлөрдү Чүй менен Повлов көчөлөрүнүн кесилишинен тапса болот.
