БИШКЕК, 17-авг. — Sputnik. Бүгүнкү күндө чек арадагы 1 170,53 чакырым жерди белгилөө долбоору түзүлүп, аны кыргыз-өзбек чек арасы боюнча утурумдук келишимге киргизүү маселеси талкууланды. Бул боюнча КР өкмөт башчысы Сооронбай Жээнбеков өзбекстандык кесиптеши Абдулла Арипов менен жолугушуу маалында журналисттерге билдирди.
Анын айтымында, чек арадагы чечилген аймактарды документтештирүү боюнча сүйлөшүүлөр өтө жемиштүү болуп жатканы көңүл жылытат.
"Жолугушуулардын жыйынтыгында бир нече протоколго кол коюлду. Мамлекеттер аралык утурумдук келишим боюнча эки тарап тең бир пикирге келди", — деди өз кезегинде өзбек өкмөт башчысы Абдулла Арипов.
Ал эми вице-премьер Жеңиш Разаков муну тарыхый окуя деп эсептейт.
"Эки тарап тең бул маселенин аягына чыккысы келип турат. Протокол боюнча чек аранын болжол менен 84 пайызын утурумдук келишимге киргизүү каралууда. Бул чоң жетишкендик. Сөз делимитация тууралуу болуп жатат. Ал эми демаркация өзүнчө процесс. Эң оор маселе делимитациялоо болчу. Анклавдар талкууланган жок, алар башка категория менен кетет", — деди Разаков.
Эске салсак, кыргыз-өзбек чек арасынын жалпы узундугу — 1 378 чакырым болсо, анын 1 058 чакырымы чечилген. Бүгүнкү күндө 324 чакырымы боюнча маселе ачык бойдон калууда.
Маалыматка караганда, акыркы бир жылда эле эки өлкөнүн тиешелүү органдары 15 жолу жолугушуу өткөрүп, долбоорлор даярдалган.
Өзбекстандын өкмөт башчысы 16-августта Бишкекке келген. Премьерлердин катышуусунда эки тараптуу кызматташуу боюнча өкмөттөр аралык комиссиянын жана чек араны делимитация жана демаркациялоо боюнча комиссиянын жыйындары өттү.
