БИШКЕК, 16-авг. — Sputnik. Лейлекте ата-энесинен ажыраган жана аз камсыз болгон үй-бүлөлөрдүн балдары үчүн курулуп жаткан билим борбору дээрлик аяктады. Бул тууралуу өкмөттүн Баткен облусундагы өкүлчүлүгүнүн маалымат кызматы билдирди.
Учурда билим борбордундагы иштер 90 пайызга аяктады.
Өкмөттүн Баткен облусундагы ыйгарым укуктуу өкүлү Абиш Халмурзаев курулуш компаниясынын өкүлдөрүнө сапатка өзгөчө маани берип, өз мөөнөтүндө курулушту бүткөрүүнү тапшырды.
"Жашоо шартынын оордугунан буга чейин мектепке барууга мүмкүнчүлүгү жетпеген балдарга жаңы окуу жылында кубаныч тартуулап, алар үчүн курулуп жаткан билим борборун 1-сентябрга ачуунун толук аракетин көрүшүбүз керек" — деди Халмурзаев.
Төрт корпустан турган билим уясы 315 окуучуга ылайыкташтырылып, жатакана, ашкана, спорт аянтчасы менен заманбап шартта курулууда.
Белгилей кетсек, бул жерде балдар орус, англис, араб тилдерин үйрөнө алат.
