Кытайда окуган кыргыз студенттерине виза берүү иши жанданды

БИШКЕК, 11-авг. — Sputnik. Кытайда билим алып жаткан кыргызстандыктарга виза даярдоо боюнча Тышкы иштер министрлиги Кыргызстандагы Кытай элчилиги менен сүйлөшүүлөрдү жүргүзгөнүн ведомствонун маалымат кызматынан билдиришти.

"Кытайда билим алып жаткан кыргыз жарандары ушул жылдын 14-августунан 15-сентябрына чейин элчиликтин консулдук бөлүмүнө дүйшөмбү, шаршемби жана жума күндөрү саат 15.00дөн 16.00гө чейин кайрылса болот", — деп айтылат билдирүүдө.

Ал эми электрондук кезек менен баргысы келгендер элчиликтин сайты аркылуу каттала алат. Бул учурда документтер элчилик белгилеген убакытта тапшырылат.

Белгилей кетсек, 2016-жылы 30-августта эртең менен Бишкектеги Кытай элчилигинин дарбазасын жанкечти жардыргыч заттар салынган машина менен барып сүзүп, жардырган. Анын кесепетинен жан кечти каза болуп, элчиликтин бакчасында иштеген Кыргызстандын үч жараны жаракат алган. Жардыруудан кийин Кытай элчилиги Кыргызстандын жарандарына Кытайга кирүү үчүн виза берүүнү токтоткон.

Мындан улам Кытайда окуган кыргызстандык 300дөй студент окууга кете албай турганы кабарланган.

КР ТИМи кыргыз студенттерине жардам берүү максатында 10-13-октябрда Кытайда окуган кыргызстандык студенттердин документтерин кабыл алган.