Жаналиев Монголиянын борборуна сегиз күндө жеткенин айтып, Баттулга менен болгон жолугушууда алган таасирлери менен бөлүштү.
"Баттулга өтө жөнөкөй киши экен. Көйгөйү менен келген кишилерди кабыл алып маселесин чечип берип жатты. Биринчи жолукканда ал мени парламенттеги бөлмөсүндө кабыл алды. Ал жерден Чыңгызхандын колодон жасалган сувенир айкелин белек кылды. Ошол эле күнү кечинде кеңсесине чакырды. Ал жактан тарткан сүрөтүмдү тапшырдым", — деди Жаналиев.
Ал Баттулга өзү да сүрөт тартканды жакшы көрөрүн айтып, өз эмгектеринин бирине кол тамгасын жана каалоо-тилегин жазып белек кылганын, аны менен кошо Монголиянын Гиннес китебин да белекке бергенин кошумчалады.
"Ал дагы кыргызстандык мекендештерге салам айтып, Кыргызстанда дагы достору бар экенин билдирди. Өз сөзүндө Кыргызстан менен Монголиянын ортосундагы достук мамиле күчөй берсин деген тилегин айтты", — деди Жаналиев.
Кыргызстандык сүрөтчү буга чейин Саякбай Каралаев, Ахмад Кадыров, Владимир Путин, Пётр I жана Чыңгыз Айтматовдун сүрөттөрүн стринг-арт ыкмасы менен тартып, коомчулуктун назарына сунуштаган.
