Кыргызстандын бардык мектептери жаңы китеп менен камсыздалат. Бул аракеттердин аркасында быйыл өлкөдөгү 56 мектептин 5-6-классынын окуучулары бардык предметтери боюнча жаңы китептер менен билим алышат. Анын алкагында окуу китептер сыналып, кийинки окуу жылда сунуш-пикирлерди эске алуу менен толук колдонууга берилет.
Жаңы мазмундагы китептерди Кыргыз билим берүү академиясы иштеп чыгууда. Академиянын вице-президенти Алмазбек Токтомаметов Sputnik Кыргызстан радиосуна долбоордун алкагында китептердин мазмуну бир топ өзгөрүп жаткандыгын билдирди.
"Азыр саналуу мектептерге сыноо катары айрым китептерди даярдап, министрликке сунуштадык. Китептер экспертизадан өткөрүлүп, айрым маселелер эске алынды. Ошентип отуруп окуу куралдарынын мазмуну бир топ өзгөрүүгө дуушар болуп жатат. Биз чет өлкөнүн эмес, Кыргызстандын тажрыйбасын колдонууга аракет кылдык", — деди Токтомаметов.
Окуу куралдарын иштеп чыгууга окумуштуулар менен мугалимдер дагы катышууда.
Андан сырткары, быйыл 30 инновациялык мектептин 7-9-классынын окуучулары үчүн жаңы мазмундагы китептер пилоттук негизде пайдаланууга берилет.
Окуу китептеринин жаңыланышы, бул маселенин күңгөй-тескейи менен Sputnik Кыргызстан агенттиги даярдаган материалдан кенен таанышсаңыз болот>>
