БИШКЕК, 9-авг. — Sputnik. 1990-жылдары Тажикстандагы саясатчыларды, журналисттерди жана окумуштууларды өлтүрүүнүн артында Иран турганы боюнча ИИМдин даректүү тасмасы мамлекеттик телеканал аркылуу көрсөтүлдү. Бул тууралуу Sputnik Тажикстан маалымат агенттиги билдирди.
Тасмада парламенттин мурдагы төрагасы Сафарали Кенжаев, саясатчы Карим Юлдошев, журналист Отахон Латиф, окумуштуулар Мухаммад Осими, Юсуф Исхак, Минходжа Гулямов, жазуучу Сайф Рахим Афарди, мурдагы муфтий Фатхуллохон жана Россиянын Тажикстанда жайгашкан 201-аскер базасындагы 20 офицердин өлүмү тууралуу баяндалат.
Белгилей кетсек, Советтер Союзу тарагандан кийин Тажикстанда өкмөттү жана оппозицияны колдогон күчтөрдүн ортосунда жаңжал чыгып, өлкөдө жарандык согуш башталган. Ал 1992-жылдан 1997-жылга чейин уланган.
Агенттиктин маалыматына ылайык, 2015-жылы Тажикстандын коргоо министринин мурдагы орун басары Абдухалим Назарзода аскердик төңкөрүш кылууга аракеттенген.
Назарзоданын тарапташтарын жок кылуу аракеттери мындан эки жыл мурун 4-16-сентябрь күндөрү жүргөн.
