БИШКЕК, 7-авг. — Sputnik. Борбордук шайлоо комиссиясы президент болом дегендердин шайлоо фондусунан 7-августка карата сарпталган каражаттар боюнча маалымат берди.
Ага ылайык, БШКнын текшерүү-көзөмөлдөө тобу шайлоого аттангандардын 28инин шайлоо фондусуна түшкөн каражаттар менен чыгымдарды эсептеген.
Акчаны сарптоо жагынан эң алдыда Өмүрбек Бабанов турат. Ал шайлоо фондусуна келип түшкөн 32 миллион сомдун дээрлик 21 миллионун (20 968 769) сарптаган. Андан кийинки орунда Темир Сариев турат. Ал чогулган 6,5 миллион сомдун 5,6 миллионун короткон. Үчүнчүдө 1 миллион 97 миң сом сарптаган Бакыт Төрөбаев турат. Анын шайлоо фондусуна 1 миллион 130 миң сом топтолгон.
Эң аз акча короткондор катарында Руслан Жунусов (11 040 сом), Казыбек Шайымбетов (12 020 сом), Сагынбек Абдрахманов (15 миң сом), Рита Карасартова (16 069 сом) бар.
Президент болом дегендер жалпысынан дээрлик 31 миллион сом сарптаган.
Ал эми шайлоо фондуна эң аз каражат Акбаралы Айтикеевге (50 сом), Замира Муратбековага (391 сом) жана Аскарбек Абышевге (1000 сом) түшкөн.
Белгилей кетсек, президент болом деп БШКга жалпысынан 59 киши арыз менен кайрылган. Бирок алардын үчөө кийин арыздарын кайтарып алган.
Презизиденттик шайлоо 15-октябрда өтөт.
