Буга чейин төрт саясатчы тең президенттикке талапкерлиги боюнча БШКга азыр беришкен
БИШКЕК, 7-авг. — Sputnik. "Ата-Журт Мекенчил", "Бүтүн Кыргызстан" жана "Өнүгүү-Прогресс" партиялары бирдиктүү күчкө айланып, президенттик шайлоого бир талапкерди сунуштоону чечкенин "Өнүгүү-Прогресс" партиясынын лидери Бакыт Төрөбаев өзүнүн Facebook баракчасына жарыялады.
"Өнүгүү-Прогресс" партиясынын лидери Бакыт Төрөбаев
"Сиздер менен жагымдуу кабарымды бөлүшкүм келип турат. Өлкө эли менен бир катар жолугушууларды өткөргөндөн кийин "Ата-Журт Мекенчил", "Бүтүн Кыргызстан" жана "Өнүгүү-Прогресс" партияларынын лидерлери жаңы партиянын алдына биригүүнү чечтик. Мунун негизги максаты — эл биримдигин, саясий туруктуулукту жана таза шайлоо өткөрүү үчүн күчүбүздү бириктирүү", — деп жазылат билдирүүдө.
Ошондой эле жаңы партия түптөөнү көздөгөн бул топ алар менен иштешүүнү каалаган саясий күчтөргө ачык экенин кошумчалады.
Эске салсак, БШКга президенттик ат салышууга ниетин билдирген арызын "Бүтүн Кыргызстан" партиясынын лидери Адахан Мадумаров, "Ата-Журт Мекенчил" партиясынын тең төрагалары Ахматбек Келдибеков менен Камчыбек Ташиев жана "Өнүгүү-Прогресс" партиясынын лидери Бакыт Төрөбаев берген.
