БИШКЕК, 3-авг. — Sputnik. Бишкек — Балыкчы жолунда ири жол кырсыгы катталганын Sputnik Кыргызстан агенттигине Саламаттык сактоо министрлигинин маалымат кызматы билдирди.
Окуя Кызыл-Өрүк айыл аймагында болгон.
"Бус менен жеңил автоунаа кагышкан. Маршрутканын ичинде Өзбекстандан келген бий тобунун мүчөлөрү келе жатса, жеңил автоунаада беш киши болгон. Кырсыктан алты бала жана үч чоң киши жабыркаган. Каза болгондор жок", — деп айтылат билдирүүдө.
Жабыркагандарга биринчи медициналык жардам көрсөтүлдү.
Аймактык ички иштер башкармалыгынын Кайгуул милициясы Sputnik Кыргызстан агенттигине жол кырсыгы тууралуу маалымат аларда жок экенин айтты.
