Бүгүн, 31-июль — сүйүп окуган китепти эске салуу күнү. Мындан улам Sputnik Кыргызстан маалымат агенттиги коомго таанымал адамдардын китеп текчесине баш багып көрдү.
1. Режиссер Эрнест Абдыжапаров Жайсаң Үмөт уулунун 10 томдон турган "Айкөл Манас" чыгармасын бош убакыт табаары менен барактап окугандан тажабайт. 10 жыл мурун Зигфрид Кракауэрдин сүйүп окуган "Природа фильма" китебин бир киночуга бере коем деп ошол боюнча ала албай арман кылып жүргөн чагы.
2. Этноырчы Гүлзада Рыскулова балдары кичинекей болгондуктан мурункудай көп китеп окуганга убактысы жок. Ошондуктан Роберт Кийосакинин электрондук варианттагы "Максаттар жана чечимдер" (Цели и решения) китебин окуп жатат. Сүйүктүү китебинин катарында Чыңгыз Айтматовдун "Тоолор кулаганда" чыгармасы бар.
3. Кыргыз драма театрынын жетекчиси Назым Меңдебаиров Михаил Шолоховдун төрт томдон турган "Тихий Дон" романын алты ай мурун окуган. Аталган чыгарма менен биринчи жолу 5-классында таанышкан. Бир ай мурун залкар жазуучу Чыңгыз Айтматовдун "Кылым карытар бир күн" романын кайрадан карап чыккан.
4. Коомдук жана саясий ишмер Феликс Кулов учурда саясий, юридикалык адабияттарды жана диндердин тарыхы боюнча китептерди окуп жаткан чагы. Көркөм адабияттан жакында эле Пауло Коэльонун "Алхимик" китебин кайрадан окуп чыккан.
5. Кыргыз чүрөгү, модель жана актриса Мээрим Атантаева америкалык жазуучу Марио Пьюзонун "Крестный отец" китебин улам окуй бергенден тажабайт.
6. Белгилүү публицист, милициянын отставкадагы полковниги Александр Зеличенко кечээ эле Ысык-Көлдө эс алып жүрүп жазуучу Артур Хейлинин "Детектив" чыгармасын кайрадан окуп келди. Ал китепти окуп жатып жан дүйнөсү абдан чыңалганын, бирок ошого карабай экинчи ирет үңүлгөнүн жашырган жок.
7. Жогорку Кеңештин депутаты Аида Салянова Чыңгыз Айтматовдун "Кылым карытар бир күн", Төлөгөн Касымбековдун "Сынган кылыч", Рим императору Марк Аврелийдин "Наедине с собой" китептерин кайталап окуп турат. Бул китептердин окшоштугу — адам болуу абийир-мансаптан баалуу дегенди туюндурарын кошумчалады.
8. Кесиптеши Садык Шер-Нияз соңку кезде англис тилин тереңдетүү максатында Джоан Роулингдин "Гарри Поттер" китебин окуп жатат. Бала кезинде автору белгисиз болгон "Чыгаан капитан" китебин көп эстейт. Ошондой эле Төлөгөн Касымбеков менен Чыңгыз Айтматовдун чыгармаларын эң көп окугандыгын кошумчалады.
9. Футбол боюнча спорт чебери Айдана Оторбаева үч жыл мурун окуган Дэниель Чиздин "Элджорнана үчүн гүлдөр" китебин көп эстейт.
10. Белгилүү эстрада ырчысы Сыймык Бейшекеев акыркы окуган китептери Чыңгыз Айтматовдун "Тоолор кулаганда", Ашым Жакыпбековдун "Теңири Манас" китептери болду. Жакында эле Төлөгөн Касымбековдун "Сынган кылыч", "Кел-Кел" романдарын кайталап окуп бүткөн.
