БИШКЕК, 29-июл. — Sputnik. Өзгөн шаарындагы борбордук базарда чыккан өрт өчүрүлдү. Бул тууралуу ӨКМдин Ош облусундагы башкармалыгынын жетекчисинин милдетин аткаруучу Сабыр Курбанбаев Sputnik Кыргызстанга билдирди.
Алдын ала маалыматка ылайык, кырсыктан 200дөн ашуун контейнер ичиндеги товары менен өрттөнүп кеткен. Өрттү өчүрүүгө жети бригада, Тез жардам жана милиция кызматкерлери тартылып, жалын болжол менен жети саатка чукул убакытта өчүрүлгөн.
"Кырсыктан бир өрт өчүрүүчүнүн бети күйүп, ооруканага жеткирилди. Учурда Жарандык коргоонуу комиссиясы тарабынан жумушчу топ түзүлүп, кырсыктын себеби, чыгымы такталып жатат. Жай жарандардан эч ким жабыркаган эмес", — деди Курбанбаев.
Өзгөндүн борбордук базарында өрт чыкканы тууралуу маалымат 4.50дө түшкөн. Үч сааттан кийин чектелип, саат 11.34тө толугу менен өчүрүлдү. Болжол менен 2000 метр куб аянт өрттөнгөн.
