Өзгөн шаарынын жашоочусу 57 жаштагы Умсунай Бубажанова 25 жылдан бери аталган базарда сатуучулук менен алектенип, тапкан кирешеси менен үй-бүлөсүн багып келген. Эки кыз, бир уулдун энеси. Өрткө 150 миң сомун жалматыптыр.
Ош облустук Өрткө каршы кызматынын өрттүн алдын алуу бөлүмүнүн башчысы Музаффар Жороевдин айтымында, 226 контейнер өрттөнгөн. Мындан сырткары, бут кийим сатуучу үстү жабылган соода жайы жана эки кабаттуу ашкананын имараты күйгөн
Ал эми Өзгөн шаарынын вице-мэри Мухаммед Макешов Өзгөн базары он эки ишкерге таандык экенин билдирди.
"Соода түйүндөрү жеке менчик болгондуктан өрттөн кийин сооданы токтотобу же улантабы ал ишкерлердин өз укугу", — деди Макешов.
Учурда өрттөнгөн контейнерлерден башка аман калган соода түйүндөрү иштеп, соода-сатык уланууда. Күлгө айланган базардын ичин сатуучулар ашар жолу менен тазалап жатышат.
